X Ü L A S Ə

Tədqiqatın məqsədi vençur kapital və biznes mələkləri mexanizmlərinin Azərbaycan kiçik və orta sahibkarlıq subyektlərinin (KOS) maliyyələşdirilməsində rolunu və təsir imkanlarını qiymətləndirməkdir.

Tədqiqatın metodologiyası - tədqiqat çərçivəsində institusional və müqayisəli təhlil metodlarından, eləcə də beynəlxalq təcrübənin öyrənilməsindən istifadə olunmuşdur. Araşdırmada Azərbaycan maliyyə ekosisteminin mövcud vəziyyəti təhlil edilmiş, vençur kapital və biznes mələklərinin KOS-ların innovasiya potensialına, rəqabət qabiliyyətinə və davamlı inkişafına təsiri qiymətləndirilmişdir.

Tədqiqatın tətbiqi əhəmiyyəti ondan ibarətdir ki, əldə edilən nəticələr KOS-ların maliyyələşdirilməsi sahəsində siyasət formalaşdıran qurumlar, startap ekosistemi iştirakçıları və investorlar üçün praktik tövsiyələr təqdim edir.

Tədqiqatın nəticələri - göstərir ki, alternativ maliyyələşmə mexanizmlərinin inkişafı KOS-ların maliyyə resurslarına çıxışını əhəmiyyətli dərəcədə genişləndirə bilər.

Tədqiqatın orijinallığı və elmi yeniliyi – tədqiqatın orijinallığı Azərbaycan şəraitində vençur kapital və biznes mələkləri mexanizmlərinin kompleks şəkildə təhlil edilməsində, elmi yeniliyi isə bu mexanizmlərin KOS-ların inkişafında sistemli rolunun konseptual əsaslarla müəyyənləşdirilməsindədir.

Açar sözlər: kiçik və orta sahibkarlıq, vençur kapital, biznes mələkləri, maliyyələşdirmə, Azərbaycan, investisiya. 

https://doi.org/10.30546/2707-2037.052.2.2026.132